يا دنيا لا تسكبي الدمعه على خد احساس روايه يابانيه ................

بسم الله الرحمن الرحيم
السلام عليكم ورحمة الله وبركاته

اعتقد واضح من العنوان والقسم انها روايـــــة ..... وقبل ما ابدا بأي شيء راح اقول لكم " كيـــف اللفت هالرواية اليابانيــة "
السنة الماضيـــة على نهاية العام الدراسيTo♥oma} ... البنت النشيطة بين صديقاتها واللي دائماً تسولف ... خلصت سواليفها وجالسة طفشانه مع ثلاث من صديقاتها , طلعت قلس من جيبها وحطته بس على الشفة السفلية فسألت وحده من صديقاتها : To♥oma} ... ليه بس حطيتيه تحت .....؟؟
ومن ذاللحظة بدا الفقش بكلمة : هذا مسلسل ياباني قاعده اتابعة هاليومين , البطله بس تحط قلس على شفتها السفلية " وللمعلومية :: في ذاك الوقت كنت مجنونة يامابي ومعروفه إلى الان اني مجنونة اليابان " نرجع للسالفه
قالت وحده : وش قصته ؟؟ فبدا التأليف وكان الغرض منه تغيير الجو الممل ... سألوني : وش اسم البطله ؟؟ .. وبدت الورطة دايركت الجواب : توني في الحلقة الاولى ما بعد حفظت الاسماء ... بديت اكمل التأليف واشوفهم تحمسوا ... هم متعودين علي أي مسلسل انهبل عليه اجي اقولهم القصه بالتفصيل وبالحركات وانا معروفه اني اذا تكلمت عن شخصيه تقمصتها صح ... لدرجة انهم يحسون اني انا ذاك الشخص ..... فهالمره صار اسهل اني اجيب شخصيات من خيالي واتقمصها ... انتهت الفسحه وقلت زيييين خلاص بارتاح واسكر على الموضوع ... الا وفي الطلعه : يالله يا To♥oma} ... كملي والله اني ما فهمت وش تقول الاستاذه بس افكر وش بيصير ..... وكذا صرت مجبوره اكمل فقشي وصرت كل يوم اقولهم ومن اليوم الثاني قلت لهم : تراني حفظت الاسماء ... لانها سهله شوي ... قلت البطله اسمها آيا في خيالي نسبه للبطله في مسلسل لتر من الدموع لاني كنت مره متأثره ... والبطل اسمه اكيرا .. في خيالي نسبه ليامابي في مسلسل نابوتا لاني كنت مجنونته ... وقلت ياجيما نسبه ليامابي في مسلسل دراقون ساكورا وكذا كذا وانا اطلع الاسماء من المسلسلات اللي شفتها .... والحين غيرت اسم ياجيما بعد ما انهبلت على ايكوتا توما وصار بداله اسم توما ..... قعدت كل يوم احضـّر وش بقولهم بكره وصرت حتى انا متحمسه اقولهم ... لين آخر يوم في الامتحانات النهائية وانا ارويها بلساني وختمتها في آخر يوم طبعاَ بنهاية غير النهاية اللي هنا ... وبعد ما خلصتها اعترفت بالحقيقه لهم وصارت بعض الاشياء لكن ما احتاج اذكرها ..جت الاجازة الصيفية وصرت اروح لبنت خالتي باليوميه بس ناقص النوم عندها..... وقعدت اقولها عن صديقاتي قالت لي طيب قولي لي القصه , قلت لها والاخت الثانية تحمست وانا انبح صوتي من الكلام المستمر .... وبعدين قالت لي اكتبيها والله حرام يروح خيالك ومن هالحكي ... انا كنت راااااافضة مرررره لاني اكره الكتابه من اعماق قلبي .... لكن بعد فتره حسيت بشوي ملل ما عندي شيء اسويه .... ثم قلت خليني اجرب واكتب ومتى ما مليت بوقف .... وسويتها وكتبتها واستمريت بكتابتها الى هذا اليوم وما بعده وصار عندي طموح اني انزلها ويكون لي مشجعين .... هذي هي قصتي ... واليوم اخيرا بأبدا ...

والحين راح انتقل الى نقاط بسيطه عن الرواية :.
1- الروايــــة طوييييله .....
2- الرواية عباره عن قصة يابانية بحته ..
3- كتبتها باللهجة السعودية " لهجة اهل الرياض "
4- بتلقون كلمات مثل " السلام عليكم – ان شاء الله وغيرها " لا تستغربون او تضحكون الرواية بلهجتنا وبنفس كلامنا بالضبط ...
5- طريقة تقسيم الرواية بتكون بالفصول وكل فصل فيه اربع اجزاء .... وبيكون مثل كذا (( الفصل الاول – الجزء 1 )) ... وبيكون لكل جزء عنوان ... مثل الحلقات في الدراما .....
6- يمكن تمر عليكم كلمات ما تفهمونها لانها رياضيه بحته ... يعني لاهل الامارات او مناطق المملكة الاخرى اذا فيه شيء ما فهمتوه من الكلام قولو لي واقوله باللغة العربية الفصحى ..... ^_^

وللمعلومية : انا ما قد قريت رواية ابدا عشان كذا انا ما اعرف اسلوب الروايات ... لكن انا اسلوبي كأنكم تشوفون مسلسل مو تقرون رواية .... عشان كذا عيشوا الجو صح ....

ننتقل الان الى الهدف الرئيسي وهي الرواية ...
اقدم لكم اول رواية لي بعنوان " يا دنبا لا تسكبي الدمعة على خدِ حساس "
وهذا هو غلاف الرواية ..

القصة :
تحكي القصة عن فتاة رقيقة في داخلها ونشيطة ومرحة في ظاهرها ,
فتاة ذات ضجة كبيرة لمن حولها
متعجرفة في التعامل مع شبان مدرستها
وبالأخص مجموعة شبان وهم مكونون من أربعة أفراد .
بطلتنا " آيا " لها صديقة حميمة تدعى " يونا " فتاتان في عمر 18
تحلمان في إيجاد رفيق مناسب رغم فشل المحاولات
فقررتا أن يتعاهدا إن حصل لإحداهن ووجدت لها رفيق
أن لا تتغير على الأخرى وتكونا صديقتين إلى الأبد
وحلمتا أن يرسمان سوية مظلة الحب .
" آيا " تعتبر زعيمة و المدافع الأول لبنات المدرسة ضد الشباب ,
وبشخصيتها القوية دائما ما تكون في خلاف مع احد أفراد تلك المجموعة
نبدأ بتعريف أسماء هذه المجموعة " أكيرا " وهو الزعيم , " توما " وهو نائب الزعيم ,
سوما و مورا
لنتعرف على شخصيات و مميزات أبطال القصة ...

وهنا فكره تسهل عليكم حفظ العلاقات في الرواية .....
[b][size=16]هنا حطيت بس اللي بيطلعون في هالاجزاء الاولى وعلاقتهم ببعض ..
ولما تتطور الاحداث راح اطلعون كل اللي في الصوره كاملين
وبتكثر الاسهم كماااان ....
تابعوا الصوره عشان تفهمون اكثـــــر ....... ^_^

وصلنا الى الاساس ووضعت لكم الجزء الاول + هدية الجزء الثاني
عشان الجزء الاول مره قصيـــر
وللمعلوميه : اذا ما شفت حماس ما راح اكمل ..

[/size][/b]

[b][size=12]في صباح يوم جديد ... (( الفصل الأول – الجزء 1 ))

الام : آيا ... آيا .. يله قومي ... يله بسرعة عشان ما تتأخرين عن المدرسة يله اليوم أول يوم مدرسي وتتأخرين عليه يله عجلي قبل ما يبدون مراسم الافتتاح ...
آيا وهي على السرير ونعسانة : طيب .. طيب خمس دقايق تكفين
الام : يله شوفي الساعة كم !!
آيا تشوف الساعة وتطمر من السرير : يماه ليش ما قومتيني مبكرة
الام : أشوى مير من سنه وأنا أقومك
آيا: توقف قدام المراية و تعدل شعرها , حلقتين مختلفات في اللون , مناكير إصبع إيه وإصبع لا , قلس وردي على الشفه السفلية ... << برأيها هذي الموضة
وتحول مستعجلة و تاكل الفطور ...
آيا : مع السلامة
الام : أتمنى لك التوفيق
وتركض تخاف إنها تتأخر أكثر ...
اجتمعوا كل الطلاب وبدأت مراسم الافتتاح ...
المدير : والآن نبدأ عام جديد ....
يونا وهي تكلم راي : وين آيا من اول يوم تتأخر
راي : يا رب توصل قبل ما تنتهي المراسم ..
آيا وهي تركض مستعجلة تسمع صوت جرس انتهاء المراسم : لاااااا يا ويلي وش بيصير عذري لأول يوم آآآه ...
تدخل وتشوف يونا وتسلم عليها ...
يونا : وينك من الصبح وانا انتظرك ... وراك تأخرتِ ؟
آيا : راحت علي نومه ... معليش اعذريني ....... المهم انا وياك في فصل واحد ولا لا ؟؟
يونا : توني ناويه أروح اشوف ... زين انك جيتي خلينا نروح ونشوف ...
راي وهي تركض : هيييييي بنات صرنا في فصل واحد ....
يونا وآيا بصوت واحد : والله ياااااااه ما اصدق ويطمرون و يصفقون يدينهم ببعض وطايرين من الفرحة ...
يروحون لفصلهم ويدخلونه ... إلا ويقابلهم توما
تسأله راي : توما أنت في أي فصل ؟؟
توما : انا في هذا الفصل ... ولا من حسن حظي كل ربعي معي
آيا وهي مرتاعة : نعم نعم لا تكفى لا يكون أكيرا وسوما هنا ؟؟؟
توما وهو يناظرها باستهزاء : اجل منهم ربعي ؟؟ المهم لا يكون أنتي معنا ؟؟
آيا بنفس النظرة : اجل وشوله أسألك ... من تعس حظي الظاهر بأقضي كل سنوات الثانوي معكم في نفس الفصل
توما مبتسم : يا سعدنا بنلقى واحد يوسع لنا صدرنا ...
سوما : توما .. ما بعد جاء أكيرا و مورا ؟؟
توما : يعني ما تعودت على تأخرهم أصلا متى قد جو مبكرين
وهم يتكلمون يدخل مورا ونصه نوم ..
مورا : صباح الخير
سوما : المفروض نقول مساء الخير
مورا : يا ابن الحلال ... ناسي إن اليوم مدرسة وراحت علي نومه ..
مورا وهو يناظر الفصل : ما شاء الله الشبيبة هم هم ما تغيروا من السنة اللي راحت
وتروح آيا تطل من الدريشة ... إلا وهي تناظر واحد يطيح الطير من السماء ... وتنهبل : يونا يونا لا يفوتك نص عمرك
يونا متفاجئة : وش عندك ؟
آيا : شوفي شوفي ... خلاص انا قررت هذا هو حبيبي المنتظر
وتركض بتروح تشوف هو في أي فصل
يونا : هييييييه آيا وين بتروحين ؟؟؟!!!
آيا وهي تركض ما تشوف طريقها وتروح لزاوية عشان تشوف بيدخل أي فصل وتعرف انه مو بفصلها وانه في الفصل اللي جنبهم ... وترجع مسرعة ضايق صدرها وهي منزله راسها من الحزن وتصدم بأكيراوتطيح على الارض ..
آيا : وجع ما تشوف طريقك
اكيرا : والله مدري من اللي ما يشوف طريقه
وتشوف آيا مدرس الأحياء .. وتبدأ التمثيل ...
آيا : آآآآآآه رجلي رجلي انا وش سويت عشان تضربني من اول يوم
اكيرا بتعجب : خير من تكلمين .. ؟!
آيا : آآه آآه أستاذ أستاذ ؟
ويجي المعلم : خير ؟ وش صاير ؟؟
آيا : ما ادري لكن ضربني فجأة وصار يهددني لأنه صار بنفس فصلي
أكيرا بتعجب : نعم نعم وش قاعدة تألفين أنتي ؟؟
المعلم : ليش كذا سويت معها ؟؟
اكيرا : والله إني ما سويت شيء خير قاعدة تألف عليك وتصدقها , انا كنت امشي بأمان الله وتجي هي تركض وتصدم فيني وتطيح وما ادري ليش قاعدة تألف
آيا وهي تمثل الصياح : هااااا أنت اللي تألف وش هالحكي اللي قاعد تقوله ...
المعلم : تعالوا تفاهموا عند المدير
آيا تتصنع الدموع وببتسامة جانبية : صادق .. طيب الحين بنروح له ...
اكيرا : هييييه وين نروح انا توني جاي وبتودوني الإدارة بسبب كذبها ...
آيا : إذا كنت صادق تعال ودافع عن نفسك
أكيرا في نفسه : يقطع أبو الوثوق يا الكذابة
ويروحون للمدير
آيا تمثل : أستاذ أستاذ شوف هذا الولد يضربني من دون سبب ويهددني
اكيرا : لا تصدقها انا وش مصلحتي من ضربها من اول النهار حتى إني ما بعد رحت لفصلي وتوني جاي
آيا : هو هددني لأني بنفس فصله عشان كذا انا ما اقدر أعيش معه في نفس الفصل
اكيرا : أصلا انا ما بعد عرفت وش فصلي يالكذابة شلون أهددك عشانك في نفس فصلي
آيا : حتى لو ما كنت في نفس فصلي لكن لازم ابعد عنك على الأقل في الفصل
المدير حمقان: خير وش هالحكي من اول يوم انتم يا الاثنين قبلكم مزعجيني من اول ما دخلتو هالثانوي ما عندي مشاكل غيركم ؟؟؟
آيا : عاقبه وغير لي فصلي انا أبي أصير في الفصل اللي جنبي ..
اكيرا : ايييه الدعوة مهيب عشاني أكيد صديقاتك في الفصل اللي جنبنا
المدير مرتفع ضغطه : خلاص بأرفع عليكم انتم يالاثنين عقاب بأفصلكم من المدرسة لأسبوع وارتاح ...
اكيرا وآيا بصوت واحد ....... : لاااااااااااااااااااااااااااااااا
آيا : خلاص عاقبني إني أصير في فصل ثاني غير فصله وصدقني منب متطاقه معه تكفى
اكيرا : انا ما أبي أتعاقب بسببها وانا برئ هذا مو عدل ...
المدير يمسك أعصابه : خلاص بأنقلك للفصل اللي جنبكم .. وياويلكم اذا تمشكلتو مع بعض ترى ما يردكم الا بيوتكم
آيا وهي طايره من الفرحة : ابشر ما راح نعيدها ...
اكيرا مميل خشته : ان شاء الله ..
المدير : يله تفضلو اطلعوا برا روحو لفصولكم ... يا صبرني عليكم
ويطلعون .... ويمشون سوا
اكيرا : خير وش هالحركة اللي سويتيها انا عارف إن عندك غاية من حركتك بس وش عندك في الفصل اللي جنبنا ؟؟
آيا : وش دخلك ؟؟
اكيرا : ترى بقوم اكفخك عاد ..
آيا : اقدر أصارخ وأقول انك ضربتني وهالمره بكون صادقه ...
اكيرا : الله يعين هذي بداية السنة ...
آيا شافت معلمه وحبت ترفع ضغط اكيرا ...
آيا تطيح على الأرض : آآآه آآه
اكيرا التفت عليها : خير وش فيك فجأة ؟
آيا : شلني رجلي تعورني ( طبعاً عادي في اليابان الولد يشيل البنت على ظهره )
اكيرا : احلفي عاد .. ما بقى إلا هو تغلط وتبيني أشيلها
أيا بصوت منخفض : معلمة الجغرافيا هنا ... وإذا ما شلتني بأقول انك ضربتني لأني قلت الصدق عند المدير
اكيرا وهو مرتفع ضغطه : أقول كنك كذبتي كذبة وصدقتيها ...
أيا : شلني ولا ترى بأصارخ
اكيرا مشى ولا عليه منها
آيا بصوت عالي عشان تسمعها المعلمة : آآآه أيه أنت دائم كذا تضربني عشاني قلت الحقيقة هين آآآه
اكيرا يرجع مستعجل : الله ياخذك انكانك بلشه
آيا بصوت منخفض : بتشيلني ولا أصارخ ؟؟
اكيرا : يله اركبي على ظهري يا البثرة
آيا : ههههه طيب ...
ويمشي بها وهي طايره من الفرحة وتغاير كل البنات إنها محمولة على ظهر واحد جميل ...
ويوم وصلوا للفصل ...
آيا : خلاص خلاص وقف بسرعة
اكيرا : خير ؟؟
آيا : وقف لا يشوفوني صديقاتي
اكيرا واصل حده : انزلي يا مال النزلة المعوية
آيا : الله ياخذك ... قل آمين ..
وتحول ....
اكيرا : وانتي معي اجمعين ...
آيا تكش عليه تدخل للفصل : بنات .. بنات
يونا : وين رحتي ؟؟
آيا : خلاص انا صرت في الفصل اللي جنبنا
راي : ليه ما كنتي في فصلنا ؟؟!
آيا : إلا بس انتقلت
يونا : آه خسارة كنت فرحانة انك معي
آيا : أسفه بس انا الصراحة كنت أبي أصير مع الطالب الجديد يمكن هو أملي الوحيد وحتى انه ما يعرف شخصيتي في المدرسة
بأمثل عليه شوي وأخليه يحبني .. وبعد انا ما اقدر أعيش مع هالشلة .. لو بقعد معهم خمس دقايق بأتفجر ...
يونا : يا حياتي انتي ..
آيا : يله ابذلي جهدك ودوري لك رفيق عشان نكون سوى
يونا : يله جت الاستاذه لازم تروحين فصلك ...
آيا : صادقة يله باي
وتدخل آيا الفصل تلف يمين يسار تدور الطالب الجديد الى وتلقاه يقرا كتاب ...
وتروح تنتص في الطاولة اللي جنبه ...
آيا : امممم à يعني انتبه لي ..
الطالب وهو يرفع راسه : هلا ..
آيا بدلع : امممم شكلك طالب جديد ... صح ؟؟
الطالب يعدل جلسته ويناظرها : أيه .... هذا اول يوم لي بالمدرسة هذي ...
آيا : اها .. انا لي سنتين في هالمدرسه عشان كذا اعرف الطلاب الجدد والقدامى
الطالب : واضح .. على طول عرفتي إني طالب جديد
آيا : إذا بغيت أي مساعده مني انا حاضرة
الطالب : شكراً
أيا : وش اسمك ؟؟
الطالب : رانجي
آيا : تشرفت بلقائك رانجي انا اسمي آيا
الطالب : اووه آيا اسمك حلو ..
آيا بحيا وهي توقف : الله يحلي ايامك ..
وتمشي خطوتين ثم تلتفت عليه وتقول بخجل : اذا بغيت أي مساعده مني انا حاضرة
الطالب طايره عيونه من انقلاب حالتها : شكرا ..
راحت وجلست في مكانها وهي طايره من السعاده ..
ودخل المعلم وبدأ الدرس .... ومر الوقت وبعد انتهاء الحصة الثالثة صفرت الفسحة ...
آيا تتوجه لرانجي : اممم رانجي اش رايك نتفسح سوا ..
الطالب : كان ودي بس ناقصني شوية ملخصات ... من الحصص اللي قبل
آيا : اها ... آسفه على الازعاج ... خذ راحتك
رانجي : لا عادي .. شكراً
وتروح لفصل صديقاتها ...
يونا تلتفت على آيا : هاه وش الأخبار؟؟
آيا : تونا ما صار شيء بس شكلها بداية موفقة ...
راي : يااااااه أخيرا بيصير لك رفيق
آيا : ادعيلي
يونا : اجل يله خلينا نروح نفطر قبل ما تنتهي الاستراحة ..
ويروحون سوا ...
توما يروح لراي : راي تعالي شوي أبيك ...
راي : وش عندك بروح افطر
توما : شوي بس
راي : طيب
مسك يدها وبعدها شوي عن صديقاتها وقال : ليه آيا غيرت فصلها مو كانت معنا ؟؟
راي : إلا لكن لقت لها طالب وتبي تكون رفيقته عشان كذا نقلت لفصله
توما : من هو هذا الطالب ؟؟
راي : طالب جديد ما نعرفه
توما : طيب ليش آيا ما جلست معه هماها تبي تصير رفيقته ؟؟
راي : هو ناقصة شوية ملخصات عشان كذا جالس في الفصل يكملها في فترة الاستراحة ...
توما فرحان : اها زين
راي : وش عندك على هالاسئلة ؟؟
توما : بس حبيت اعرف ليش آيا غيرت الفصل فجأة
راي : اجل يله انا الحين بروح عشان ما أتأخر على البنات ..
ويتوادعون ...
ويروح توما لأكيرا ويعلمه السالفة ...
أكيرا : زاد طبعها متغير ... والله كنت حاس إن عندها غاية من اللي قاعدة تسويه .. على العموم هو الحين لحاله في الفصل صح ؟؟
توما : إيه وش عندك ؟
اكيرا : شوية انتقام من آيا لاستغلالي ...
توما : بدينا من اول يوم
سوما : انا مستعد ...
مورا : يوه حركاتكم حركات بزارين ... انا بروح افطر ومالي دخل فيكم ..
اكيرا : مطرح ما يسري يمري
يروح سوما ويدخل الفصل ويقعد جنب الطالب ويتكلم معه ..
ومشا اليوم وآيا لا تسعها الفرحة ....
ترجع للبيت وتستلقي على السرير وتفكر وش بتسوي في المستقبل ...
وفي اليوم التالي .. وهذا الجزء الثانيــ ..... هديـــة

لماذا هم في طريقي (( الفصل الأول – الجزء 2 ))

تقوم آيا بنشاط وحيوية ... توقف قدام المراية , و تعدل شعرها , حلقتين مختلفات في اللون ( فوشي و ابيض ) ,
مناكير إصبع أيه وإصبع لا( فوشي ) , قلس وردي على الشفاه السفلى بس ...
وتحول تاكل فطورها ... وتروح المدرسة طايره من الفرحة
تدخل الفصل : صباح الخير
تتلفت يمين يسار ما تلقى رانجي ......
تروح لفصل صديقاتها : يونا راي~
يونا : وش فيك ؟؟ وراك تنادين بصور عالي ؟؟
آيا : ما شفتي الطالب الجديد
يونا : امممم إلا كان مع توما وشلته ..
آيا : نعم .. لا يكون بيخربونه علي ... وينهم ؟؟
يونا : برا في السيب اللي جنبنا ..
وتركض آيا وتشوفه مع الشبيبة
آيا حمقانه : أكيرااااااااا ليش رانجي عندكم ؟؟
الطالب : أوه صباح الخير
آيا انتبهت لنفسها : آه صباح الخير ... كنت أدورك لان المعلمة جت
الطالب : والله غريبة مره مبكرة على جيتها للفصل
آيا : أيه هي مزاجية .. وش رايك تسبقني للفصل ... انا عندي شوية كلام مع أكيرا
الطالب : لا تتأخرين ... مع السلامة
آيا : مع الف سلامة ...
وبعد ما تأكدت انه راح تلتفت على الشبيبة بنظرة مرعبة : وش كنتو تتكلمون عنه ... ؟؟
أكيرا : انا عرفنا انه حبيبك المنتظر عشان كذا لازم نعلمه عن شخصيتك
آيا : نعم نعم .... من اللي أذن لكم إنكم تعلمونه عني شيء
اكيرا : هههه امزح ولا شيء بس حبينا نعرف من هو اللي هابلك بس
آيا: الله من اللقافة .... إياني وإياكم تكلمونه مره ثانية وانا ما أعرفكم ولا انتم تعرفوني .... خلاااااص
اكيرا بصوت منخفض : عقب ايش ياماما .. قد هاوزت
وتروح آيا بسرعة للفصل وتدخل .. وتروح تقعد محلها
الطالب رانجي : ما بعد جت المـُدرسة ليش قلتي إنها جت ...
آيا متورطة : هههه صارت في الفصل اللي جنبنا وحسبت إنها بتدخل فصلنا ههه ههه
الطالب رانجي : اها
آيا : وش كنت تسوي مع شلة الشباب اللي قبل شوي ..... ؟؟
الطالب رانجي : ابد كانوا يتكلمون عنك
آيا : والله ... وش كانوا يقولون ؟؟
الطالب : امممم يعني شوية كلام عادي انك كنتي في الفصل اللي جنبنا و انتقلتِ هنا عشان واحد و انك درستي معهم في نفس الفصل سنتين
ومن هالقبيل ....
آيا : بس ؟؟
الطالب باستفهام : أيه ... ليه فيه شيء غريب ؟؟
آيا مرتاحة : ههه لا بس انا مشهورة شوي في المدرسة عشان كذا كل الطلاب يعرفوني هه هه
الطالب رانجي وهو يشوف فمها واذنينها ويدينها وهو يتكلم : اها .... واضح
دقيقة صمت بين الاثنين بعدين تكلم رانجي : آيــا
آيا باهتمام : نعم ....
رانجي بخجل : حلقك اللي لابستهم مختلفين في اللون ...
آيا تسوي نفسها ما تدري : هاه اوه كيف لا بسـ .... خلاص بفسخه وتفسخه وتحطه بجيبها ....
الطالب : ليش أظافرك بعضها فيها مناكير والباقي لا ... خلصت مناكيرك ؟؟؟
آيا متورطة : هاه لا بس انا أحبهم كذا إذا كان ما يعجبك خلاص أحط بكل أظافري
الطالب : انتي تعبانه من اول النهار من اول ما تكلمتي وانا ملاحظ ..... شفايفك واحد فيه لون وواحد لا ... انتي تعانين من حاجة في شفتك ؟؟
آيا : واه لا لا ما كنت تعبانة بس من العجلة على المدرسة نسيت احط قلس على كل شفايفي.... اشونك نبهتني بحط بكل شفايفي ...
وتطلع القلس من الشنطة وتحط على كل شفايفها ...
آيا وهي تبتسم : كذا يعجبك ؟؟
الطالب : الصراحة ما كنت منتبه من هالاشياء لكن طالب اسمه سوما قالي انك بتطلعين على شخصيتك الحقيقية إذا قلت هالاشياء وانك تعصبين من اللي يقولها ... بس ما عنده سالفه ...
آيا واصله نفسيتها أف : آه سوما قالك هالشي ؟؟
الطالب : أيه جاني أمس وقالي
آيا في نفسها : والله لأقتلك انت و زعيمك آآآآآآآآه
الطالب : وش فيك ؟؟
آيا انتبهت : آآه لا ولا شيء
وتدخل المعلمة ويسكتون ... يمر الوقت ويطلعون للفسحة ... آيا سيييييده على الشلة : سومااااااااااااااااا
يلتفت اكيرا : شباب شباب البنت شكلها عرفت ....
تجي آيا معصبه : سوما وش هالحركة اللي سويتها
سوما : وش سويت
آيا : يعني يقالك ما تعرف وش سويت ؟؟؟
سوما : انا ما سويت شيء
آيا : وش هالكلام اللي قلته لرانجي
سوما : آه فهمت لا تسأليني اسألي اكيرا انا مالي دخل بشيء
آيا : نعم
أكيرا : إحنا بس حبينا نعرف هو ينفع لك ولا لا ؟؟
آيا : شكراً بس انا ما طلبت منكم هالشيء
أكيرا : بس ترانا اكتشفنا انه ما ينفع لك
آيا باستهزاء : لاه أشوى مير .. و وشو هالاكتشاف الخطير ... ؟؟
اكيرا : هو راعي غياب كثير ... وبعد يقول انه عادي يغيب ثلاث أرباع السنة ولا يهمه احد وبارد الطباع مره
آيا : طيب وإذا كان ... يعني هالشيء يخليه ما ينفع يصير رفيق لي .. ؟؟
اكيرا : شلون بتعيشين مع واحد زي كذا ... أنتي حارة ما ينفع تعيشين معه
آيا : مالك دخل ... انا اعرف شلون بأتصرف
اكيرا : طيب خلاص مالنا دخل .. إحنا علمناك وبس ...
آيا : الله من اللقافه ...
وتروح آيا لصديقاتها ... : اوووووووه انا وش أسوي بهالشلة .. اقتلهم ليش دائم يوقفون في طريقي .. ؟؟
يونا : وش فيك ؟؟
آيا تقولها كل شيء وتقعد يونا تواسيها ... وترجع آيا للبيت ... خلص البارت الثاني واكرر للمعلوميه اذا ما شفت تفاعل ما راح اكمل [/size][/b]

اذا شفـت نشـاط و ردود حـلـوة أكمـل
ومـا بي أحد يرد مـو فاهـم شي بليـز

وآآآآوٍ ألقصصصهِ ممممرهٍ روعهِ

ومممكنٍ تعطينيٍ آسسمٍ ألرويهٍ بأنجليزي

او تححححطيٍ رآآبطٍ التحممميلِ الفلمممم ماله

تسلمين حياتي منورة اهي مو فلم و مالها تحميل انا كل اسبوع انزل لكم جزء اذا شفت تفاعل

wooooooooooooow

raw3a

thannxx

واااو حلوووه

nice
continue

روّوّوّوّوّوّوّوّوّوّوّعِــهِ وربـــيّ الروآآيه
بلييـز حيــآتوو كمليهــآ وربيِ خقييييتّ ع الآآخــّر
+++

اوو ؟؟ رووووعهآآ الروايةة

خلصيها حياااااتي

بتجنن كيووووووووت

وااااو

يا دنيا لا تسكبي الدمعه على خد احساس روايه يابانيه ................ 460605

قصه سووو ناايس يا دنيا لا تسكبي الدمعه على خد احساس روايه يابانيه ................ 143316

يا دنيا لا تسكبي الدمعه على خد احساس روايه يابانيه ................ 1574693603

يسلموو يا قمر..~

خيآآل

بلييييز كوول قيرل كمليها

وربي خااقه حدي

يسلموو تم +

عشانكم نزلت هل بارت

هل هذه نهايتي ؟؟ (( الفصل الأول – الجزء 3 ))

تقوم آيا من النوم ... توقف قدام المراية , حلقين نفس اللون , مناكير على كل الأظافر , قلس على كل الشفا يف ..
آيا: كذا بيعجبه ... ^^
تحول و تاكل الفطور وتروح بسرعة للمدرسة تدخل الفصل ما تلقى الطالب
تروح سييييييييده للشلة ولا تلقاه معهم ... تسأل صديقاتها وبعض الطلاب يقولون أنهم ما شافوه ....
يضيق صدرها وتقعد تنتظر دخل المعلم وبدأ الدرس ... وصار غايب
جلست محبطه طول الوقت ....
جو صديقاتها لها في الاستراحة ولقوها حاطه راسها على الطاولة ...
يونا : آيا وش فيك ؟؟
راي : عادي كل الناس يغيبون
آيا ساكتة وما تتكلم ....
وشوي التفتت عليهم : بنات روحوا انا ما أبي افطر ... معليش أبي اقعد لحالي ...
ويروحون وتصير لحالها في الفصل ...
يدخل توما ويروح لها : امممم كل هذا عشانه ؟؟؟ عادي الناس كلهم يغيبون وإحنا أمس قايلين لك انه كثير الغياب ... لازم تتعودين اذا كان اختيارك
آيا ساكتة ولا كنها تسمع
توما عيونه على السقف : آه صح راي تقول تو إنها تبيك عاجل روحي لها
آيا ترفع راسها وباهتمام : وش فيها ؟؟
توما : شكل عندها شيء مهم حتى إنها أرسلتني ...
آيا توقف : وش صاير .... طيب هي وينها الحين ... ؟؟
توما : تعالي انا بروح لها بعد ... تجين معي ..
آيا وقلبها بيطلع من مكانه : اكيد ..
وتروح آيا معه لمعمل الكيمياء .... يوقفون قدام باب المعمل
توما : ادخلي هي هنا
آيا تدخل بسرعة تبي تشوف صديقتها وش صار فيها ... تفاجأت ان المعمل مظلم وما فيه احد وما درت الا بتوما يسكر الباب عليها ...
آيا: هيه توما خير افتح الباب ...
تطق بالباب وهو مقفول ... وتنهبل
وتجيها يد من وراها وتصير على كتفها ..... وتصارخ بأعلى صوت من الروعة وتروح للزاويه يجيها شيء يتدحرج تصرخ مره ثانية ولا حياة لمن تنادي عاشت حاله رعب في المعمل غير طبيعية ... فجأة ينفتح النور وتطلع ضحكات شخص تكرهه ..
اكيرا ميت من الضحك : ههههه حلوه والله انك خوافة وتحفة ...
سوما يمسح دموعه من الضحك : يا حليلك شكلك متي من الرعب حسيت اني بفلم وانتي البطله ههههههه
مورا : مسكينة على هالحاله زاد أنتي ليش تصدقين توما عارفته كذاب ؟؟
ويفتح توما الباب ويدخل مرعوب من الصرخات << يخاف احد يسمعه من الطلاب .....
آيا رايحه وطي والدموع في عيونها .... تتكلم وفمها يرتجف : اكيرا تحفة وخوافه
وتلتفت على سوما : بطلة فلم
دارت بنضرها على توما ومورا والدموع تنزل منها ..... صرخت صرخة مدويه هزت المدرسه قايله : اكرهكممممممممممممم ......
وتطلع بسرعة وهي تصيح ...
اكيرا مفجوع : الظاهر هالمره بالغنا صح ؟؟
مورا : قايل لكم بيت الرعب ما يونسها ...
توما : يوه الظاهر صدق كرهتنا .. !!
سوما : وش بنسوي الحين ؟؟
وتروح آيا وتصيح على الطاولة من اعماق قلبها ...
وتصفر الفسحة ....
آيا تمسح دموعها قبل ما يدخلون الطلاب الفصل ويشوفونها تصيح .... عاد يبدا الاستجواب س و ج ... صار عندها الحصة الرابعة فراغ ....
جاء طالب للفصل ويقول : فيه طالبة اسمها آيا هنا ؟؟
آيا : نعم هذي انا
الطالب : ممكن تطلعين فيه شخص يبغاك ...
آيا خذها فكرها بعيد : معقولة قلق علي وجاء يشوفني
وتطلع بسرعة معه
وتحول تحت وتلقى قدامها أكيرا
الطالب : هذا هو الطالب اللي يبيك
ويروح الطالب ... تقعد آيا مميله فمها ... : خير وش تبي ؟
اكيرا : تعالي معي
آيا : وش تبي ؟؟
اكيرا : اخلصي
ويمسك يدها ويسحبها وراه
ويمشون إلا والشبيبة كلها قدامها
سوما : ساعة بسرعة يله قبل ما يدري احد
اكيرا : يله يله بس افتح الباب
توما : خلاص فاتحينه بس يله بسرعة
آيا في وجهها الدهشة : خير وين بنروح ؟؟
ويدخلون لصالة كرة السلة ويطلعون من بابها الثاني اللي يطلع للشارع ...
وفيه سياكل <<< جمع سيكل يعني دراجة
يركبون السياكل ... وآيا واقفة ما تبي تركب
آيا : خير وين بتودوني ؟؟ انا ما أبي أروح معكم
أكيرا : اركبي وراي واخلصي وأنتي ساكتة
آيا : على كيفك انا برجع للمدرسة
أكيرا يمسك يدها : يله اركبي وراي
يسحبها غصب وتركب وراه ويسرعون بالنحشة عن المدرسة ...
آيا خايفه : وقف وقف نزلني
وتطق على ظهره ... يلتفت عليها أكيرا : أعلمك شيء
آيا: نعم
اكيرا : تدرين إن طقك لي مثل قرصه النملة ... تراني ما أحس أبدا بها ........ بس تعورين يدينك ...
آيا : آآآآه ترى بصارخ وأقول انك مختطفني
اكيرا : الله يبلشك .... أقول اسكتي ... مالقيت إلا أخطفك انتي ... لو اخطف كل بنات المدرسة ولا أخطفك انتي منطقة خطر
آيا : طيب علمني انا رايحين وين .. ؟؟
اكيرا : توما انا بأسرع اوكي ..
توما : اوكي
ويطير اكيرا من السرعة
آيا : هيييييييييه هدي هدييييييييي ... تكفى انا بموت من الرعب ... آآآآآآآآه أخاف تجي سيارة وتصدمنا ..
اكيرا : لو تسكتين اصرف من إزعاجك ...
ويمشي الوقت على كذا ... ويوقفون قدام بيت
أكيرا : وصلنا
آيا : وش هالبيت .. هذا بيتك ؟؟؟
اكيرا : لا .. خلينا نشوف هو بيت مين
يرن مورا الجرس ... وهو ينفتح الباب
آيا : أصلا انا غلطانة يوم أجي معــ .....
وتشوف الطالب رانجي هو صاحب البيت ... تتمالك نفسها وتعدل شعرها وتنزل عيونها بالأرض
الطالب رانجي : أوه انتم ... هلا والله
سوما : ههه معليش على الزيارة المفاجئة
الطالب رانجي : لا عادي تفضلوا
كلهم بصوت واحد : زاد فضلك ....
ويدخلون وآيا ذايبة من الحيا ...
يتوجهون لمكان الجلوس ويقعدون ....
الطالب رانجي : مو المفروض تصيرون الحين في المدرسة
اكيرا : هو المفروض لكن قلقنا عليك وتركنا المدرسة وجينا
الطالب : يعني هاربين ؟!
توما : لا ... لا تسميه هروب لكن تقدر تسميه زيارة قلق هه هه
سوما : آه بالمناسبة ليش اليوم غايب . ؟؟
الطالب : والله راحت علي نومه
اكيرا : وانت عادي انك تغيب
الطالب وهو يوقف متجه للمطبخ : عادي انا ما تهمني المدرسة ... عن اذنكم
الكل : اذنك معك ...
غاب رانجي بضع دقائق يجيب لهم حاجة تنشرب لزوم الضيافه ....
آيا فيه هذي الاثناء كانت تدور بنظرها في جميع الزوايا وفجأة تطيح عينها على صوره لرناجي ومعه بنت لا ارادياَ انقزت ومسكت الصوره وجلست تتأملها ...
وفي رجعته شاف آيا ماسكة الصوره ...
وهو يحط الصينية على الطاوله
رفعت آيا نظرها وقالت : من هذي البنت ... اختك ؟؟
الطالب : لا هذي رفيقتي
الكل ناظر بعض بدهشة وحولو نظرهم لآيا ... وآيا بدت ترتجف يدينها ... وعيونها تجمعت فيها دموع .. تدراكت نفسها ونزلت عيونها على الصورة ...
آيا بتحسر : آه رفيقتك اجل ... ما شاء الله حلوه ..
الطالب : تسلمين ما عليك زود ...
اكيرا : طيب هي وينها ؟
رانجي وهو يوزع كاسات العصير : هي في المدرسة اللي كنت فيها ... لكن أشوفها كثير ...
آيا وكن ناغزها شيء وقفت فجأه وعطتهم ظهرها : شباب انا رايحه المدرسة ... شكرا رانجي على الضيافة ..
الطالب : توك جاية اقعدي شوي
وتمشي آيا ما كأنها سمعته والدموع في عيونها ....
سوما : إحنا بنقعد ترى ... هييييييه آيا ؟؟
وتطلع برا ضايق صدرها تمشي وقلبها بينشق نصين من قوي العبره تقول في نفسها : شكل دموعي بتخلص وبرجع من الصفر ... ثم تلتفت على البيت وتاخذ نفس عميق وتمسح دموعها تحاول ترجع طبيعية : وجع محد لحقني يواسيني ........ على الأقل يوصلني للمدرسة
مير عناد فيهم بآخذ واحد من سياكلهم ....
وترجع للسياكل ... مسكت سيكل اكيرا وتحس واحد واقف وراها تلتفت وتلقى اكيرا ...
اكيرا : وش عندك ؟؟ ليش طلعتي فجأة ؟؟
آيا تتكلم تدرعي القوه : يعني يقالك ما تفهم ...
اكيرا : ما كنا ندري صدقينا
آيا : لا انا اعرف انكم تبون تقهروني ... بس كل هذا عشاني ركبت على ظهرك ؟؟
اكيرا : لا لا السالفة مو كذا ... طيب يله اركبي بوصلك للمدرسة وبحكي لك في الطريق ....
وركبت معه بالسيكل ومشوا ...
اكيرا : احنا شفناك متضايقة ليش ان رانجي غايب اليوم وزياده على كذا متعدله وسويتي كل اللي كان يبيه منك يعني كل اللي تقولين موضه تنازلتي عنها بسببه .... فكرت إني غلطت مره يوم أوسع لك صدرك وأحط لك بيت رعب فقلت مهيب فرحانة إلا لما تشوفه .. وخذناك له
لكن اضن فشلنا للمرة الثانية .... انا آسف
تفاجئت آيا من أسلوبه اللبق معها بدت تتكلم معه بهدوء وقالت : شكرا لك اكيرا لو ما رحت اليوم لبيته كان ما عرفت إن عنده رفيقه ... هو بس عجبني عشانه وسيم ولان ما عندي رفيق ... حبيت أصادق واحد ما يعرفني من قبل ...
وقف اكيرا والتفت عليها : آيا انتي تبين رفيق ؟؟
انا أعرفك من فتره واعرف وش اللي يعجبك في أي ولد عشان كذا انا بساعدك على إيجاد رفيق جديد
ناظرت آيا له باستغراب : انت صادق بكلامك ولا تمزح ؟؟
اكيرا : لا انا ما امزح هالمره انا صادق
آيا : طيب من هو هذا اللي ينفع لي ... ؟؟
اكيرا : واحد اعرفه يوم كنت في المرحلة المتوسطة بس يوم رحنا الثانوي ما صار في مدرستنا وصار في الحي اللي جنبنا .... بس بيعجبك لأنه وسيم مره وبعد أجمل مني .
آيا لما عرفت انه جميل : طيب شلون بتعرفني عليه ... ؟؟
اكيرا : طيب انتي اسمعي لتعليماتي وبكره لازم ننفذها ...
آيا : يعني بقابله بكره
اكيرا : أيه ... بس يله بقولك كل شيء وأبيك تنفذينه بدقة ... خلاص ؟؟؟
ويرجعون للمدرسة بخلسه ويدخلون ... وآيا مستعدة لمقابله رفيقها المنتظر ...

لماذا الفشل يتبعني (( الفصل الأول – الجزء 4 ))

تقوم آيا من الصباح تستعد وتتشيك عشان تقابل رفيقها المنتظر ...
تحول وتأكل فطورها .. وتروح المدرسة بسرعة ...
تدخل المدرسة وتروح الفصل ويمر اليوم إلى الحصة الخامسة ...
بعد انتهاء الدرس:
آيا توقف: أستاذ ... أستاذ ....
المعلم يرفع نظره لها : نعم....
آيا:ممكن أروح لدورة المياه ؟؟
المعلم:طيب بس لا تتأخرين ؟؟
آيا : طيب ..
وفي فصل اكيرا ....
اكيرا : أستاذ .. أستاذ ...
المعلم :نعم
أكيرا :ممكن أروح لدورة المياه ؟؟
المعلم : لا
اكيرا :استاذ ضروري تكفى..
المعلم: طيب بس ياويلك ان تأخرت
اكيرا: طيب
هناك في سطح المدرسة آيا تنتظر اكيرا ..جاها طاااااااير ويالله يتنفس..
آيا : سلمات وش صار ؟
اكيرا : الله ياخذ هالمدرس ما بغى يطلعلني نشب في حلقي
آيا: ايه اهم شيء انك طلعت يالله قبل ما يدرون عننا
اكيرا: يالله
ويمشون سوى بسرعة وينزلون من الدرج ... تشوف آيا معلمة الرياضيات
فجأة تطيح من الدرج .. ويسرع وراها اكيرا
آيا وهي ماسكه ركبتها : آآآه رجلي رجلي تعورني
اكيرا : وش فيك ؟؟
تجي المعلمة بسرعة : سلمات ماتشوفين شر وش فيك ؟؟
تمثل آيا إن فيها جرح وهي تحط القلس على ركبتها
آآآآآآآآآآآآآآآآآآآآآآآآآآآآآآآآآآآآه ركبتي ..تهي تهي آآه
المعلمة ماتدري وش تسوي: قومي قومي اوديك للطبيبة
اكيرا : يا الله تنزف ركبتها .
المعلمة :بسرعة لازم ناخذها للطبيبة ..
اكيرا بثقه : لالا سمعت اليوم إن الطبيبة ما حضرت
المعلمة : ياربي صح ...وش السوات
اكيرا بكل بساطة شال آيا بين يديه وهو يقول للمعلمة :انا بوديها للمستوصف القريب من المدرسة ..استاذة روحي خذي لنا اذن من المدير لان اصابتها قوية يالله الحق عليها
المعلمة طايرة بوهتها: طيب طيب ..لحظه وش أسمائكم ...
اكيرا وهو يركض : انا أكيرا وهي آيا
ويطلعون من المدرسة وينزل اكيرا آيا
اكيرا :الظاهر الأمور تمشي زي ما بغينا ...ويرفع يده يصفقها بيد آيا
آيا : يس مثل بغينا ....وفجأه تغيرت ملامحها الى استفهام: لحظه لحظه انت وش دراك ان الطبيبة غايبة اليوم؟؟
أكيرا وهو يعدل ياقة بلوزته: احم احم سمعتها أمس تكلم المدير وتقوله إنها اليوم مهيب مداومة
آيا : اها ..ربي يحبنا ههههه
اكيرا : هههه ...
اكيرا يغير نظرته اقول يله بسرعة نروح للمستوصف القريب لان إذا تأخرنا بيسألون المستوصف عنا عاد تخيلي ننكشف عقب الفلم اللي سويناه
آيا وهي تمسح القلس من ركبتها وتحط لزاق جروح: يالله بسرعه مو ناقصين..
وينطلقون بسرعة برا المدرسة متجهين للمستوصف لقو عندهم زحمة حمدو ربهم ان عندهم عذر عشان يقدمونه للمدير اذا رجعوا..
ويتجهون الى مدرسة صديق اكيرا..ويدخلون بكل ثقة ..
الفراش من وراهم : هيه يا اولاد
اكيرا وآيا يلتفتون: نعم
الفراش: من انتم ..لبسكم ما يدل انكم من هالمدرسه ؟؟
اكيرا : أيه إحنا من مدرسة قيشالي العليا ( اسم مدرستهم ) ..
الفراش: طيب وش عندكم في مدرستنا ... ؟؟
اكيرا : احنا المسئولين عن صحة الغذاء المدرسي (صحة الغذاء المدرسي هي عباره عن مجموعة طلاب يطبقون على مدارس تختارها لهم مدرسة للتأكد من صحة الغذاء يكونون مرتدين نفس لبس المدرسة و توزع عليهم بطاقات تدل انهم من المسؤولين عن صحة الغذا)
ويطلع بطاقتين ( مزوره ) انهم من المسئولين عن صحة الغذاء المدرسي
الفراش : آه بس هم وعدونا انهم بيجون بعد شهر ...
اكيرا : لا تغير الوقت وصارت بعض اللخبطة شوي عشان كذا اليوم هو يوم الزيارة لهالمدرسة ..
آيا تشوف أكيرا بتعجب من وين خرف هالكلام ...
الفراش : آسف على ازعاجكم ..طيب تقدرون تروحون تفضلو من هنا الكفتيريا ويأشر بيده لناحية الكفتريا..
اكيرا نزل راسه :لاعادي بالعكس هذا يدل على حرصك على المدرسة
آيا: شكرا ياعم ..
الفراش مبتسم: لاشكر على واجب
اكيرا يلتفت على آيا وهو يغمز لها: يالله مشينا ويتجهون للكفتيريا
آيا وهي متشققه من اللعبة : والله انك خطير عليك تأليف عجيب
اكيرا مستانس: اعجبك انا اكيرا مو حيالله.ههههههه
آيا:ياشين الوثوق ههههه
اكيرا:امشي امشي بس
دخلو الكفتريا
آيا تشوف الغذاء : يوه الصراحة انا ما أحب أكل المدارس أبدا وهذا طعمه شين ما يعجبني
اكيرا : هو فيه احد مشاورك ... أقول عبي الاستبانه بكلمه ممتاز خلينا نخلص ...
آيا : بس احنا ما قلنا الصدق
اكيرا : سوي اللي أقوله لك وأنتي ساكتة ..
ويخلصون من تعبئة الاستبانات بسرعة و يرقون للدور الثاني ...
يتلفتون عليهم كل الطلاب لان لبسهم مختلف
آيا في نفسها: ياكرهنيلي لهالنظرات
اكيرا : يوه ذا وين فصله ؟؟
آيا :اسأل احد من هاللي بياكلونا بنظراتهم كأننا كائنات فضائية
اكيرا: وانتي الصادقة
توه بيتحرك إلا يسمع احد من وراه يقول لوسمحت..
اكيرا يلتفت ويكلمه : هلا
ويقابلهم طالب : انت اكيرا ؟؟
اكيرا : أيه..من معي
الطالب : ما اصدق انك ما تذكرني ؟؟
اكيرا : لا .. من انت ؟؟
الطالب : انا تيدوس كنت معك في المتوسط نسيت ... يوه مرت سنتين ما شفتك ... الصراحة تغيرت
اكيرا بكذب : اها تيدوس اي اتذكرك والله المتوسط كانت ايام حلوة
الطالب: ايوة صدقت.
اكيرا : بالمناسبة تعرف وين " اساوا " ؟؟
الطالب : ايه هو في فصلي ...
اكيرا : والله ياليت توديني له
الطالب : ابببشر.. أممم من هالبنت الجميلة اللي معك ؟؟
آيا تبتسم وتوها بترد
اكيرا : وين اساوا ؟؟
آيا ميلت خشتها على جنب وفي بالها : ياخي خلني ارد ماتسمعه يقول جميلة مالت عليك
الطالب وعينه على آيا: ههه تفضل تفضل من هنا..
ويروحون للفصل و اساوا حاط راسه على الطاولة ..
اكيرا : آيا اوقفي عند الباب لين اقولك ادخلي اوكي ؟؟
آيا منقهره يقطع ام الذل: طيب
يدخل اكيرا الفصل...
آيا في نفسها : من اجل عين تكرم مدينة
وعيونها ترمش بترقب للرفيق الجميل المنتظر ..
اكيراوهو يتقدم لصديقة ويوقف قدام طاولته: احم احم
اساوا يرفع راسه ...هنا آيا دوروها فاتحة خشتها وعيونها بتطلع من مكانها من هالمفاجئة
اكيرا مبتسم وهو يمد يده : من فتره طويلة ما شفتك ... شلونك ؟؟
اساوا يوقف ويسلم وهو مبسوط: انا بخير الحمد لله ... شلونك انت ؟؟
اكيرا : تمام
اساوا : والله أمس يوم اتصلت علي وقلت انك بتجي استانست مره ...
اكيرا: الله يخليك
اساوا بتسائل: مو قلت انك بتجيب معك شخص ثاني وينه ما اشوفه!؟..
اكيرا : ايه لحظه شوي...
ويلتفت اكيرا ويقول : آيا ادخلي
آيا وهي ما ودها تدخل وتقول في نفسها : نعم يبيني ادخل
اكيرا : تعالي ولا تستحين
آيا في نفسها : الله من قله .. ما لقيت إلا انا استحي منك و من أشكالك
وتدخل يالله يالله وتوقف جنب اكيرا منزله راسها ..
الطالب اساوا عاجبته آيا قال : ماشاء الله من هذي يا اكيرا ؟
آيا وهي ميتة رعب .. في نفسها : تكفى لا تقول
اكيرا : هذيــ ...<<<< وتضغط آيا على رجله
اكيرا : اح اح .. هذي << و تضغط مره ثانية
اكيرا وبصوت عالي : هذي رفيقتي
آيا بدهشة تشوفه
الطالب اساوا : وااااااااااااااااو اكيرا عندك ذوق
اكيرا بورطة : هه ههه هههه .تسلم
الطالب اساوا : مره تناسبون بعض ..
آيا ببتسامه تخفي دهشتها و تقول في نفسها : ايه مره ... كثر منها
اكيرا: يالله يالحبيب صار لازم نرجع لمدرستنا الحين .. مع السلامة
ويسحب آيا ويطلعون برا بسرعة
الطالب اساوا: وش فيه اكيرا الحين مكلمني عشان يوريني صديقته ..؟!
بعدين يبتسم وهو يتذكر شكلها : والله عندك ذوق يا اكيرا هالزين من يتركه ..
هناك قدام مدرسة اساوا وقفو الاثنين واكيرا يلهث وفي نفس الوقت مستحي من آيا تناظر لوجهه تستنى منه مبرر للي سواه
يوقف اكيرا قدام آيا بكل استحياء: آسف
آيا حمقانه : آسف على ايش على الحركة اللي سويتها وتقلده (هذي رفيقتي )ولا من هالصديق اللي فجعتني فيه قال ايش وتقلده (اجمل مني بيعجبك) هاااه..... انت تبي تحرجني بس ؟؟
اكيرا : لا والله ما كان قصدي كذا والله..الصراحة كان اجمل مني يوم كنا في المتوسط ما توقعت انه في سنتين بيتغير ... وعشان أطلعك من المشكلة قلت انك رفيقتي .. فهمت ؟؟
آيا بحزن : ايه فهمت ... فهمت إن مالي نصيب أبدا ... وكل مره أحاول فيها افشل ... انا مالي نصيب ابدا
اكيرا رحمها: انا بحاول اساعدكـ...
آيا تقطع كلامه وهي تحرك راسها يمين ويسارو تسد اذانيها : خلااااااااااااااااااص ... خلاص انا ما أبي اسمع أكثر
وتمشي شوي وتلتفت عليه والدموع في عيونها : شكرا لك اكيرا ..
بعدها راحت تركض ما تشوف دربها من الدموع
لحقها اكيرا وعلامات الحزن عليه لانه يحس ان هذي ثالث مره يتسبب في حزنها ونزول دموعها ..
يرجع الاثنين حزينين بدون اي فايدة و يدخلون المدرسة وتقابلهم مدرسة الرياضيات
المعلمة باهتمام: هاه بشروا وش اخبار ركبتك يا آيا؟؟
آيا ترفع راسها ووجهها يدل على إنها ميته من الصياح
اكيرا يتكلم بسرعه: ما فيها الا العافية يقول الدكتور إنها حاله عادية ... والحمد لله ما صار لها شيء غير جرح بسيط في ركبتها ...
يلتفت على آيا :صح آيا
تناظره آيا بعيون انهكها التعب و تمشي بهدوء وترقى الدرج ولا كأن احد كلمها...
نزل اكيرا راسه وقال في نفسه :ما الومك كل هاللي جاك مني......
المعلمة تناظر اكيرا :وجهها ما يعجبني ... ليش صايره كذا .. ؟؟
اكيرا يصرف:ههه ايه هي تقول إن الجرح شوي يعورها ..
ويحرك يدينه :دلع بنات دلع بنات لا تاكلين هم ويمشي ويخليها في حيرتها ..
يمر اليوم وآيا بحزن ترجع البـيت وتصيح على السرير ... واكيرا يرجع للبيت مهموم من اللي صار فيها ..
أحداث الفصل الثاني::
الجزء الأول :
اكيرا : المهم هيئي نفسك لان الحفلة الساعة 8 ونص الليل ... خلاص ؟؟
آيا : قلت لك منب جاية وشوله مصر
الجزء الثاني :
توما : آيا ممكن أسألك سؤال ؟؟
تلتفت آيا عليه ... : قول
توما : انتي تكرهينا ؟؟
الجزء الثالث :
الطالب كيو : انا وأنتي كلنا مالنا أرفقاء واجتمعنا اليوم ... كأن القدر يبي
آيا : وش يبي ؟؟
الطالب كيو يمسك يد آيا : آيا تصيرين رفيــــ.....
الجزء الرابع :
اكيرا : آيا .. أيا ردي آيا
ويهزها وما تتحرك ...
اكيرا : آيا .... آيا ........ ؟؟

والله قصه رووعهــ يا دنيا لا تسكبي الدمعه على خد احساس روايه يابانيه ................ 143316

مشكووره حبيبتى عالزياده الحلوه يا دنيا لا تسكبي الدمعه على خد احساس روايه يابانيه ................ 215793

يآآآآي حمستيني زيآده ~ْ

آتمنى مآ تتآخري في البارت الجاي ~ْ

لك ودي~ْ

» احلي روايه قرايته (((((( الكل يدخل ))))))
» احساس رائع .....